ਵਿਦੇਸ਼ੀ ਕਾਮਿਆਂ ਨੂੰ ਕੈਨੇਡਾ ਸਰਕਾਰ ਦਾ ਤੋਹਫ਼ਾ

ਕੈਨੇਡਾ ਦੀ ਫੈਡਰਲ ਸਰਕਾਰ ਨੇ ਮੁਲਕ ਅੰਦਰ ਰਹਿ ਰਹੇ ਲੱਖਾਂ ਵਿਦੇਸ਼ੀ ਕਾਮਿਆਂ ਲਈ ਇੱਕ ਬੇਹੱਦ ਅਹਿਮ ਤੇ ਰਾਹਤ ਭਰਿਆ ਐਲਾਨ ਕੀਤਾ ਹੈ। ਇਮੀਗ੍ਰੇਸ਼ਨ ਵਿਭਾਗ ਵੱਲੋਂ ਜਾਰੀ ਕੀਤੀ ਗਈ ਨਵੀਂ ਆਰਜ਼ੀ ਨੀਤੀ ਤਹਿਤ ਹੁਣ ਕੈਨੇਡਾ ਵਿੱਚ ਵੈਲਿਡ ਵਰਕ ਪਰਮਿਟ ਰੱਖਣ ਵਾਲੇ ਕਾਮਿਆਂ ਨੂੰ ਛੋਟੀ ਮਿਆਦ ਦੇ ਕੋਰਸ ਕਰਨ ਲਈ ਵੱਖਰੇ ਤੌਰ ’ਤੇ ਸਟੱਡੀ ਪਰਮਿਟ ਲੈਣ ਦੀ ਲੋੜ ਨਹੀਂ ਪਵੇਗੀ। 9 ਸਤੰਬਰ 2026 ਨੂੰ ਜਾਰੀ ਇਸ ਨੋਟੀਫਿਕੇਸ਼ਨ ਨੇ ਉਨ੍ਹਾਂ ਤਮਾਮ ਨੌਜਵਾਨਾਂ ਅਤੇ ਕਾਮਿਆਂ ਨੂੰ ਵੱਡੀ ਰਾਹਤ ਦਿੱਤੀ ਹੈ, ਜੋ ਕੰਮ ਦੇ ਨਾਲ-ਨਾਲ ਆਪਣੀ ਵਿੱਦਿਅਕ ਯੋਗਤਾ ਜਾਂ ਤਕਨੀਕੀ ਹੁਨਰ ਨੂੰ ਨਿਖਾਰਨਾ ਚਾਹੁੰਦੇ ਸਨ ਪਰ ਸਟੱਡੀ ਪਰਮਿਟ ਦੇ ਝੰਜਟਾਂ ਕਾਰਨ ਅਟਕੇ ਹੋਏ ਸਨ।
ਪੁਰਾਣੇ ਨਿਯਮਾਂ ਦੀ ਮੁਸ਼ਕਲ ਤੇ ਅੜਿੱਕਾ
ਕੈਨੇਡਾ ਦੇ ਇਮੀਗ੍ਰੇਸ਼ਨ ਅਤੇ ਰਫਿਊਜੀ ਪ੍ਰੋਟੈਕਸ਼ਨ ਰੈਗੂਲੇਸ਼ਨਜ਼ ਦੇ ਸੈਕਸ਼ਨ 188(1)(ਫ) ਅਨੁਸਾਰ ਪਹਿਲਾਂ ਇੱਕ ਬਹੁਤ ਹੀ ਸਖ਼ਤ ਸ਼ਰਤ ਲਾਗੂ ਸੀ। ਨਿਯਮ ਮੁਤਾਬਕ ਕੋਈ ਵੀ ਵਿਦੇਸ਼ੀ ਨਾਗਰਿਕ ਬਿਨਾਂ ਸਟੱਡੀ ਪਰਮਿਟ ਦੇ 6 ਮਹੀਨੇ ਜਾਂ ਉਸ ਤੋਂ ਘੱਟ ਸਮੇਂ ਦਾ ਕੋਰਸ ਸਿਰਫ਼ ਤਾਂ ਹੀ ਕਰ ਸਕਦਾ ਸੀ, ਜੇਕਰ ਉਹ ਕੋਰਸ ਉਸ ਦੀ ਕੈਨੇਡਾ ਵਿੱਚ ਪਹਿਲੀ ਐਂਟਰੀ  ਦੀ ਮਿਆਦ ਦੇ ਅੰਦਰ-ਅੰਦਰ ਪੂਰਾ ਹੁੰਦਾ ਹੋਵੇ। ਅਮਲ ਵਿੱਚ ਇਹ ਹੁੰਦਾ ਸੀ ਕਿ ਕਈ ਕਾਮਿਆਂ ਦੇ ਵੀਜ਼ੇ ਤੇ ਵਰਕ ਪਰਮਿਟ ਬਾਅਦ ਵਿੱਚ ਰੀਨਿਊ ਜਾਂ ਐਕਸਟੈਂਡ ਹੋ ਜਾਂਦੇ ਸਨ, ਪਰ ਪਹਿਲੀ ਐਂਟਰੀ ਦੀ ਮਿਆਦ ਲੰਘ ਚੁੱਕੀ ਹੁੰਦੀ ਸੀ। ਇਸ ਕਾਰਨ ਵੈਧ ਵਰਕ ਪਰਮਿਟ ਹੱਥ ਵਿੱਚ ਹੁੰਦਿਆਂ ਹੋਇਆਂ ਵੀ ਕਾਮੇ ਬਿਨਾਂ ਸਟੱਡੀ ਪਰਮਿਟ ਕੋਈ ਕੋਰਸ ਨਹੀਂ ਕਰ ਸਕਦੇ ਸਨ।
ਨਵੀਂ ਨੀਤੀ ਦੀਆਂ ਮੁੱਖ ਸ਼ਰਤਾਂ ਅਤੇ ਰਾਹਤ
ਨਵੀਂ ਨੀਤੀ ਨੇ ਪੁਰਾਣੀ ਗੁੰਝਲ ਮੁਕਾ ਦਿੱਤੀ ਹੈ। ਹੁਣ ਜੇਕਰ ਤੁਹਾਡੇ ਕੋਲ ਚਾਲੂ ਵਰਕ ਪਰਮਿਟ ਹੈ ਅਤੇ ਤੁਸੀਂ 6 ਮਹੀਨੇ ਜਾਂ ਇਸ ਤੋਂ ਘੱਟ ਸਮੇਂ ਦਾ ਕੋਈ ਕੋਰਸ ਕਰਨਾ ਚਾਹੁੰਦੇ ਹੋ, ਤਾਂ ਤੁਹਾਨੂੰ ਕਿਸੇ ਸਟੱਡੀ ਪਰਮਿਟ ਦੀ ਲੋੜ ਨਹੀਂ। ਭਾਵੇਂ ਤੁਹਾਡਾ ਇਹ ਕੋਰਸ ਪਹਿਲੀ ਐਂਟਰੀ ਦੀ ਤਾਰੀਖ਼ ਲੰਘਣ ਤੋਂ ਬਾਅਦ ਵੀ ਚੱਲਦਾ ਰਹੇ, ਤਾਂ ਵੀ ਤੁਸੀਂ ਬਿਨਾਂ ਰੋਕ-ਟੋਕ ਪੜ੍ਹਾਈ ਜਾਰੀ ਰੱਖ ਸਕਦੇ ਹੋ।
ਨੀਤੀ ਕਦੋਂ ਤੋਂ ਲਾਗੂ ਅਤੇ ਕਿੰਨਾ ਸਮਾਂ ਰਹੇਗੀ ਜਾਰੀ?
ਇਹ ਨੀਤੀ 4 ਸਤੰਬਰ 2026 ਤੋਂ ਲਾਗੂ ਹੋ ਚੁੱਕੀ ਹੈ ਅਤੇ 31 ਦਸੰਬਰ 2027 ਤੱਕ ਚੱਲੇਗੀ (ਭਾਵੇਂ ਮਨਜ਼ੂਰੀ 5 ਅਗਸਤ ਨੂੰ ਹੀ ਮਿਲ ਗਈ ਸੀ)। ਪਰ ਆਰਜ਼ੀ ਫ਼ੈਸਲਾ ਹੋਣ ਕਰਕੇ ਸਰਕਾਰ ਕੋਲ ਇਸ ਨੂੰ ਬਿਨਾਂ ਨੋਟਿਸ ਦਿੱਤੇ ਕਿਸੇ ਵੀ ਵੇਲੇ ਵਾਪਸ ਲੈਣ ਦਾ ਹੱਕ ਰਹੇਗਾ। ਕਾਮਿਆਂ ਨੂੰ ਇਹ ਛੋਟ ਉਨ੍ਹਾਂ ਦੇ ਆਪਣੇ ਵਰਕ ਪਰਮਿਟ ਦੀ ਮਿਆਦ ਖ਼ਤਮ ਹੋਣ ਤੱਕ ਜਾਂ ਪਾਲਿਸੀ ਦੇ ਮੁੱਕਣ ਤੱਕ ਹੀ ਮਿਲੇਗੀ।
ਪਿਛੋਕੜ: ਪਹਿਲੀ ਨੀਤੀ ਦੇ ਖ਼ਾਤਮੇ ਮਗਰੋਂ ਬਣਿਆ ਸੀ ਦਬਾਅ
ਦਰਅਸਲ ਅਜਿਹੀ ਹੀ ਇੱਕ ਰਾਹਤ ਭਰੀ ਨੀਤੀ ਕੈਨੇਡਾ ਸਰਕਾਰ ਵੱਲੋਂ 27 ਜੂਨ 2023 ਨੂੰ ਸ਼ੁਰੂ ਕੀਤੀ ਗਈ ਸੀ, ਜਿਸ ਨੇ ਲੱਖਾਂ ਕਾਮਿਆਂ ਨੂੰ ਸਿੱਖਿਅਤ ਹੋਣ ਦਾ ਮੌਕਾ ਦਿੱਤਾ ਸੀ। ਪਰ ਉਹ ਪੁਰਾਣੀ ਨੀਤੀ 27 ਜੂਨ 2026 ਨੂੰ ਆਪਣੀ ਮਿਆਦ ਪੂਰੀ ਕਰਕੇ ਸਮਾਪਤ ਹੋ ਗਈ ਸੀ। ਪਿਛਲੀ ਨੀਤੀ ਖ਼ਤਮ ਹੁੰਦਿਆਂ ਹੀ ਵਰਕ ਪਰਮਿਟ ਵਾਲੇ ਕਾਮਿਆਂ ਵਿੱਚ ਭਾਰੀ ਬੇਚੈਨੀ ਫੈਲ ਗਈ ਸੀ ਕਿਉਂਕਿ ਉਨ੍ਹਾਂ ਦੇ ਕਈ ਕੋਰਸ ਵਿਚਾਲੇ ਲਟਕਣ ਦਾ ਖ਼ਤਰਾ ਬਣ ਗਿਆ ਸੀ। ਹੁਣ ਸਰਕਾਰ ਨੇ ਉਸੇ ਪੁਰਾਣੀ ਨੀਤੀ ਨੂੰ ਨਵੇਂ ਰੂਪ ਵਿੱਚ ਦੁਬਾਰਾ ਜਾਰੀ ਕਰਕੇ ਕਾਮਿਆਂ ਦੀ ਇਸ ਚਿੰਤਾ ਨੂੰ ਹਮੇਸ਼ਾ ਲਈ ਠੱਲ੍ਹ ਪਾ ਦਿੱਤੀ ਹੈ।
ਲੱਖਾਂ ਪ੍ਰਵਾਸੀ ਕਾਮਿਆਂ ਨੂੰ ਮਿਲੇਗਾ ਸਿੱਧਾ ਲਾਹਾ
ਇਸ ਫ਼ੈਸਲੇ ਦਾ ਦਾਇਰਾ ਬਹੁਤ ਵੱਡਾ ਹੈ ਕਿਉਂਕਿ ਇਹ ਸਿੱਧਾ ਲੱਖਾਂ ਪਰਿਵਾਰਾਂ ਨਾਲ ਜੁੜਿਆ ਹੋਇਆ ਹੈ। ਸਰਕਾਰੀ ਅੰਕੜਿਆਂ ਮੁਤਾਬਕ ਕੈਨੇਡਾ ਵਿੱਚ ਇਸ ਵੇਲੇ ਲਗਭਗ 15 ਲੱਖ ਵਿਦੇਸ਼ੀ ਕਾਮੇ ਸਿਰਫ਼ ਵਰਕ ਪਰਮਿਟ ਸਿਰ ’ਤੇ ਰਹਿ ਰਹੇ ਹਨ। ਇਸ ਤੋਂ ਇਲਾਵਾ 6 ਲੱਖ ਤੋਂ ਵੱਧ ਅਜਿਹੇ ਵਿਦਿਆਰਥੀ ਵੀ ਹਨ, ਜਿਨ੍ਹਾਂ ਕੋਲ ਕੰਮ ਕਰਨ ਦੀ ਖੁੱਲ੍ਹ ਹੈ। ਇਹ ਨਵਾਂ ਐਲਾਨ ਇਨ੍ਹਾਂ 15 ਲੱਖ ਕਾਮਿਆਂ ਲਈ ਆਪਣਾ ਭਵਿੱਖ ਸੰਵਾਰਨ ਦਾ ਇੱਕ ਵੱਡਾ ਮੌਕਾ ਬਣ ਕੇ ਆਇਆ ਹੈ।
ਨੌਕਰੀ ਵਿੱਚ ਤਰੱਕੀ ਅਤੇ ਪੱਕੇ ਹੋਣ ਦੇ ਰਾਹ ਹੋਣਗੇ ਸੌਖੇ
ਵਿਦੇਸ਼ ਦੀ ਧਰਤੀ ’ਤੇ ਪੱਕੇ ਪੈਰੀਂ ਹੋਣ ਯਾਨੀ ਪੀਆਰ ਲੈਣ ਲਈ ਹਮੇਸ਼ਾ ਸਥਾਨਕ ਯੋਗਤਾ ਅਤੇ ਤਜਰਬੇ ਦੀ ਬਹੁਤ ਵੱਡੀ ਅਹਿਮੀਅਤ ਹੁੰਦੀ ਹੈ। ਇਸ ਨਵੀਂ ਛੋਟ ਨਾਲ ਕਾਮੇ ਆਪਣੀ ਨੌਕਰੀ ਦੇ ਨਾਲ-ਨਾਲ ਸ਼ਾਮ ਨੂੰ ਜਾਂ ਵੀਕਐਂਡ ’ਤੇ ਸਥਾਨਕ ਕਾਲਜਾਂ ਤੋਂ ਸਰਟੀਫਿਕੇਟ, ਲਾਇਸੈਂਸਿੰਗ ਪ੍ਰੋਗਰਾਮ, ਜਾਂ ਤਕਨੀਕੀ ਕੋਰਸ ਕਰ ਸਕਣਗੇ। ਕੰਮ ਵਾਲੀ ਥਾਂ ’ਤੇ ਲੋੜੀਂਦੇ ਸਰਟੀਫਿਕੇਟ ਹਾਸਲ ਕਰਨ ਨਾਲ ਨਾ ਸਿਰਫ਼ ਉਨ੍ਹਾਂ ਦੀ ਤਨਖ਼ਾਹ ਅਤੇ ਅਹੁਦਾ ਵਧਣ ਦੀਆਂ ਸੰਭਾਵਨਾਵਾਂ ਬਣਨਗੀਆਂ, ਸਗੋਂ ਐਕਸਪ੍ਰੈੱਸ ਐਂਟਰੀ ਅਤੇ ਪ੍ਰੋਵਿੰਸ਼ੀਅਲ ਨਾਮਜ਼ਦਗੀ  ਵਰਗੇ ਪ੍ਰੋਗਰਾਮਾਂ ਵਿੱਚ ਵੀ ਉਨ੍ਹਾਂ ਦੇ ਪੁਆਇੰਟ ਮਜ਼ਬੂਤ ਹੋਣਗੇ।
ਪ੍ਰਵਾਸੀ ਭਾਈਚਾਰੇ ਲਈ ਸੁਨਹਿਰੀ ਮੌਕਾ
ਮਾਹਿਰਾਂ ਦਾ ਮੰਨਣਾ ਹੈ ਕਿ ਕੈਨੇਡਾ ਦੀ ਮਾਰਕੀਟ ਵਿੱਚ ਹੁਨਰਮੰਦ ਕਾਮਿਆਂ ਦੀ ਵੱਡੀ ਘਾਟ ਹੈ। ਇਸ ਨੀਤੀ ਨਾਲ ਕਾਮਿਆਂ ਨੂੰ ਸਟੱਡੀ ਪਰਮਿਟ ਦੀਆਂ ਲੰਮੀਆਂ ਕਤਾਰਾਂ, ਮਹੀਨਿਆਂ ਦੀ ਉਡੀਕ ਅਤੇ ਹਜ਼ਾਰਾਂ ਡਾਲਰਾਂ ਦੇ ਕਾਗ਼ਜ਼ੀ ਖ਼ਰਚਿਆਂ ਤੋਂ ਛੁਟਕਾਰਾ ਮਿਲ ਗਿਆ ਹੈ। ਇਹ ਕਦਮ ਕੈਨੇਡਾ ਦੀ ਆਰਥਿਕਤਾ ਅਤੇ ਪ੍ਰਵਾਸੀ ਕਾਮਿਆਂ—ਦੋਹਾਂ ਲਈ ਲਾਹੇਵੰਦ ਹੈ। ਇਸ ਲਈ ਵਰਕ ਪਰਮਿਟ ’ਤੇ ਰਹਿ ਰਹੇ ਹਰ ਵਿਅਕਤੀ ਲਈ ਇਹ ਵੇਲਾ ਆਪਣੀ ਕਾਬਲੀਅਤ ਨੂੰ ਤਰਾਸ਼ਣ ਅਤੇ ਬਿਨਾਂ ਕਿਸੇ ਕਾਨੂੰਨੀ ਅੜਿੱਕੇ ਤੋਂ ਆਪਣੇ ਭਵਿੱਖ ਨੂੰ ਸੁਰੱਖਿਅਤ ਕਰਨ ਦਾ ਸਭ ਤੋਂ ਢੁੱਕਵਾਂ ਮੌਕਾ ਸਾਬਤ ਹੋਵੇਗਾ।