ਨਸਲਵਾਦੀ ਹਮਲੇ ਖ਼ਿਲਾਫ਼ ਭਖੀ ਅਮਰੀਕੀ ਸਿਆਸਤ, ਡੈਮੋਕ੍ਰੇਟਸ ਵੱਲੋਂ ਜਵਾਬਦੇਹੀ ਦੀ ਮੰਗ

ਅਮਰੀਕਾ ਦੇ ਵਾਇਓਮਿੰਗ ਸੂਬੇ ਤੋਂ ਦਿਲ ਹਿਲਾਉਣ  ਵਾਲੀ ਖ਼ਬਰ ਸਾਹਮਣੇ ਆਈ ਹੈ। ਇੱਥੇ ਇੱਕ ਸਿੱਖ ਟਰੱਕ ਡਰਾਈਵਰ ਉੱਤੇ ਅਣਪਛਾਤੇ ਵਿਅਕਤੀ ਵੱਲੋਂ ਕਾਤਲਾਨਾ ਹਮਲਾ ਕਰਕੇ ਚਾਕੂ ਨਾਲ 17 ਵਾਰ ਕੀਤੇ ਗਏ। ਇਸ ਖ਼ੂਨੀ ਕਾਰੇ ਨੇ ਪੂਰੇ ਅਮਰੀਕਾ ਵਿੱਚ ਵੱਸਦੇ ਦੱਖਣੀ ਏਸ਼ੀਆਈ ਭਾਈਚਾਰੇ ਦੇ ਪੈਰਾਂ ਹੇਠੋਂ ਜ਼ਮੀਨ ਖਿਸਕਾ ਦਿੱਤੀ ਹੈ। ਰੋਜ਼ੀ-ਰੋਟੀ ਕਮਾਉਣ ਗਏ ਪਰਦੇਸੀ ਕਾਮਿਆਂ ਵਿੱਚ ਇਸ ਘਟਨਾ ਤੋਂ ਬਾਅਦ ਭਾਰੀ ਸਹਿਮ ਦਾ ਮਾਹੌਲ ਬਣ ਗਿਆ ਹੈ। ਹਸਪਤਾਲ ਦੇ ਬਿਸਤਰੇ 'ਤੇ ਪਏ ਜ਼ਖ਼ਮੀ ਡਰਾਈਵਰ ਨੇ ਆਪਣੀ ਹੱਡਬੀਤੀ ਸੁਣਾਉਂਦਿਆਂ ਦੱਸਿਆ ਕਿ ਇਹ ਹਮਲਾ ਬਿਲਕੁਲ ਬਿਨਾਂ ਕਿਸੇ ਕਸੂਰ ਜਾਂ ਭੜਕਾਹਟ ਦੇ ਕੀਤਾ ਗਿਆ ਸੀ।

​ਇਹ ਦਰਦਨਾਕ ਵਾਰਦਾਤ ਬੀਤੇ ਐਤਵਾਰ ਦੀ ਸਵੇਰ ਨੂੰ ਵਾਪਰੀ, ਜਦੋਂ ਪੀੜਤ ਸਿੰਘ ਆਪਣਾ ਟਰੱਕ ਲੈ ਕੇ ਪੈਨਸਿਲਵੇਨੀਆ ਵੱਲ ਜਾ ਰਿਹਾ ਸੀ। ਲੰਮੇ ਸਫ਼ਰ ਦੌਰਾਨ ਉਹ ਦੱਖਣੀ ਵਾਇਓਮਿੰਗ ਦੇ ਇੱਕ ਜਾਣੇ-ਪਛਾਣੇ ਰੈਸਟ ਏਰੀਆ ਵਿੱਚ ਬਾਥਰੂਮ ਜਾਣ ਲਈ ਰੁਕਿਆ ਸੀ। ਸਿੰਘ ਪਹਿਲਾਂ ਵੀ ਅਕਸਰ ਇਸ ਥਾਂ 'ਤੇ ਰੁਕਦਾ ਹੁੰਦਾ ਸੀ ਅਤੇ ਕਦੇ ਕੋਈ ਦਿੱਕਤ ਪੇਸ਼ ਨਹੀਂ ਸੀ ਆਈ। ਜਿਉਂ ਹੀ ਉਹ ਬਾਥਰੂਮ ਵੱਲ ਵਧਿਆ, ਉਸ ਨੂੰ ਮਗਰ ਕਿਸੇ ਦੇ ਕਦਮਾਂ ਦੀ ਆਹਟ ਸੁਣਾਈ ਦਿੱਤੀ। ਅਜੇ ਉਹ ਪਿੱਛੇ ਮੁੜ ਕੇ ਵੇਖਣ ਹੀ ਲੱਗਾ ਸੀ ਕਿ ਹਮਲਾਵਰ ਨੇ ਸਿਰ 'ਤੇ ਕਹਿਰ ਢਾਹ ਦਿੱਤਾ ਅਤੇ ਬਿਨਾਂ ਕੁਝ ਬੋਲੇ ਅੰਨ੍ਹੇਵਾਹ ਕੁੱਟਮਾਰ ਸ਼ੁਰੂ ਕਰ ਦਿੱਤੀ।

​ਮਾਮਲਾ ਸਿਰਫ਼ ਕੁੱਟਮਾਰ ਤੱਕ ਹੀ ਸੀਮਤ ਨਹੀਂ ਰਿਹਾ। ਹਮਲਾਵਰ ਨੇ ਝੱਟ ਆਪਣੀ ਜੇਬ ਵਿੱਚੋਂ ਤਿੱਖਾ ਚਾਕੂ ਕੱਢ ਲਿਆ ਅਤੇ ਸਿੰਘ ਉੱਤੇ ਲਗਾਤਾਰ ਵਾਰ ਕਰਨੇ ਸ਼ੁਰੂ ਕਰ ਦਿੱਤੇ। ਧੌਣ, ਪਿੱਠ ਅਤੇ ਢਿੱਡ ਸਮੇਤ ਉਸ ਦੇ ਸਰੀਰ 'ਤੇ 17 ਥਾਵਾਂ ਉੱਤੇ ਡੂੰਘੇ ਜ਼ਖ਼ਮ ਕਰ ਦਿੱਤੇ ਗਏ। ਖ਼ੂਨ ਨਾਲ ਲੱਥਪੱਥ ਕਰਕੇ ਹਮਲਾਵਰ ਮੌਕੇ ਤੋਂ ਰਫ਼ੂ-ਚੱਕਰ ਹੋ ਗਿਆ। ਸਿੰਘ ਕਿਸੇ ਤਰ੍ਹਾਂ ਡਿੱਗਦਾ-ਢਹਿੰਦਾ ਬਾਹਰ ਪਾਰਕਿੰਗ ਵਾਲੇ ਪਾਸੇ ਆਇਆ ਅਤੇ ਕੰਕਰੀਟ ਦੀ ਸੜਕ 'ਤੇ ਬੇਹੋਸ਼ ਹੋ ਕੇ ਡਿੱਗ ਪਿਆ।

​ਇਸ ਨਾਜ਼ੁਕ ਘੜੀ ਵਿੱਚ ਰੱਬ ਬਣ ਕੇ ਇੱਕ ਹਿਸਪੈਨਿਕ ਪਰਿਵਾਰ ਉੱਥੇ ਬਹੁੜਿਆ। ਉਸ ਵੇਲੇ ਰੈਸਟ ਸਟਾਪ 'ਤੇ ਮੌਜੂਦ ਇਸ ਪਰਿਵਾਰ ਨੇ ਬਿਨਾਂ ਪਲ ਗਵਾਏ ਖ਼ੂਨ ਨਾਲ ਲੱਥਪੱਥ ਸਿੰਘ ਨੂੰ ਸੰਭਾਲਿਆ। ਉਨ੍ਹਾਂ ਨੇ ਉਸ ਦੇ ਵਗਦੇ ਖ਼ੂਨ ਨੂੰ ਰੋਕਣ ਲਈ ਮੁੱਢਲੀ ਮਦਦ ਕੀਤੀ ਅਤੇ ਤੁਰੰਤ ਐਮਰਜੈਂਸੀ ਮੈਡੀਕਲ ਟੀਮ ਨੂੰ ਸੂਚਿਤ ਕੀਤਾ। ਸਿੰਘ ਨੇ ਹਸਪਤਾਲ ਵਿੱਚੋਂ ਬੋਲਦਿਆਂ ਭਰੇ ਮਨ ਨਾਲ ਆਖਿਆ ਕਿ ਇਸ ਪਰਿਵਾਰ ਦੀ ਨੇਕੀ ਨੇ ਉਸ ਨੂੰ ਮੌਤ ਦੇ ਮੂੰਹੋਂ ਕੱਢ ਕੇ ਦੂਜੀ ਜ਼ਿੰਦਗੀ ਬਖ਼ਸ਼ੀ ਹੈ, ਨਹੀਂ ਤਾਂ ਉਸ ਨੇ ਨਹੀਂ  ਬਚਣਾ ਸੀ।

​ਇਸ ਦਰਦਨਾਕ ਕਾਂਡ ਤੋਂ ਕੁਝ ਦਿਨ ਪਹਿਲਾਂ ਹੀ ਅਮਰੀਕਾ ਦੇ ਹੋਮਲੈਂਡ ਸਕਿਓਰਿਟੀ ਵਿਭਾਗ ਦੇ ਸੋਸ਼ਲ ਮੀਡੀਆ ਖ਼ਾਤੇ ਤੋਂ ਇੱਕ ਬੇਹੱਦ ਇਤਰਾਜ਼ਯੋਗ ਪੋਸਟ ਪਾਈ ਗਈ ਸੀ। ਉਸ ਪੋਸਟ ਵਿੱਚ ਇੱਕ ਭਾਰਤੀ ਦੀ ਤਸਵੀਰ ਲਗਾ ਕੇ ਲਿਖਿਆ ਗਿਆ ਸੀ, "ਸਾਡੀਆਂ ਸੜਕਾਂ ਤੋਂ ਲਾਂਭੇ ਹੋ ਜਾਓ, ਤੁਹਾਨੂੰ ਗੱਡੀ ਚਲਾਉਣੀ ਨਹੀਂ ਆਉਂਦੀ, ਮਿਸਟਰ ਸਿੰਘ।" ਲੋਕਾਂ ਵਿੱਚ ਭਾਰੀ ਰੋਸ ਫੈਲਣ ਤੋਂ ਬਾਅਦ ਵਿਭਾਗ ਨੇ ਇਹ ਪੋਸਟ ਹਟਾ ਤਾਂ ਦਿੱਤੀ ਸੀ ਅਤੇ ਸਫ਼ਾਈ ਦਿੱਤੀ  ਸੀ ਕਿ ਇਹ ਕਿਸੇ ਪੁਰਾਣੇ ਹਾਦਸੇ ਦੇ ਮੁਲਜ਼ਮ ਹਰਜਿੰਦਰ ਸਿੰਘ ਬਾਰੇ ਸੀ, ਪਰ ਇਸ ਪੋਸਟ ਨੇ ਨਫ਼ਰਤ ਦੀ ਅੱਗ ਵਿੱਚ ਘਿਓ ਪਾਉਣ ਦਾ ਕੰਮ ਕੀਤਾ। ਭਾਈਚਾਰੇ ਦਾ ਕਹਿਣਾ ਹੈ ਕਿ ਅਜਿਹੇ ਗ਼ੈਰ-ਜ਼ਿੰਮੇਵਾਰਾਨਾ ਪ੍ਰਚਾਰ ਨੇ ਸਿੱਖ ਡਰਾਈਵਰਾਂ ਦੀ ਸੁਰੱਖਿਆ ਖ਼ਤਰੇ ਵਿੱਚ ਪਾ ਦਿੱਤੀ ਹੈ।

​ਇਸ ਮਾਮਲੇ ਦੇ ਭਖਦਿਆਂ ਹੀ ਅਮਰੀਕੀ ਸਿਆਸਤ ਵਿੱਚ ਵੀ ਤਿੱਖੀ ਤਕਰਾਰ ਸ਼ੁਰੂ ਹੋ ਗਈ ਹੈ। ਹਾਊਸ ਮਾਈਨੌਰਟੀ ਲੀਡਰ ਹਕੀਮ ਜੈਫ਼ਰੀਜ਼ ਨੇ ਡਟਵਾਂ ਬਿਆਨ ਜਾਰੀ ਕਰਦਿਆਂ ਆਖਿਆ ਕਿ ਦੱਖਣੀ ਏਸ਼ੀਆਈ ਭਾਈਚਾਰੇ ਖ਼ਿਲਾਫ਼ ਦਿਨ-ਬ-ਦਿਨ ਵਧ ਰਹੀ ਨਫ਼ਰਤ ਜ਼ਮੀਰ ਨੂੰ ਝੰਜੋੜ ਕੇ ਰੱਖ ਦੇਣ ਵਾਲੀ ਹੈ। ਉਨ੍ਹਾਂ ਨੇ ਟਰੰਪ ਪ੍ਰਸ਼ਾਸਨ ਦੇ ਗ੍ਰਹਿ ਵਿਭਾਗ ਨੂੰ ਨਿਸ਼ਾਨੇ 'ਤੇ ਲੈਂਦਿਆਂ ਦੋਸ਼ ਲਾਇਆ ਕਿ ਸਰਕਾਰੀ ਤੰਤਰ ਵੱਲੋਂ ਅਜਿਹਾ ਜ਼ਹਿਰੀਲਾ ਅਤੇ ਨਸਲੀ ਪ੍ਰਚਾਰ ਕੀਤਾ ਜਾ ਰਿਹਾ ਹੈ, ਜਿਸ ਨਾਲ ਘੱਟ-ਗਿਣਤੀਆਂ 'ਤੇ ਹਮਲੇ ਵਧ ਰਹੇ ਹਨ।

​ਜੈਫ਼ਰੀਜ਼ ਨੇ ਰਿਪਬਲਿਕਨ ਪਾਰਟੀ ਦੇ ਆਗੂ ਬੋ ਫ੍ਰੈਂਚ ਦਾ ਜ਼ਿਕਰ ਵੀ ਕੀਤਾ, ਜਿਸ ਨੇ ਯੂਨੀਵਰਸਿਟੀ ਆਫ਼ ਟੈਕਸਾਸ ਵਿੱਚ ਜਸ਼ਨ ਮਨਾ ਰਹੇ ਭਾਰਤੀ ਵਿਦਿਆਰਥੀਆਂ ਖ਼ਿਲਾਫ਼ ਸ਼ਰਮਨਾਕ ਟਿੱਪਣੀਆਂ ਕੀਤੀਆਂ ਸਨ। ਜੈਫ਼ਰੀਜ਼ ਨੇ ਸਾਫ਼ ਸ਼ਬਦਾਂ ਵਿੱਚ ਕਿਹਾ ਕਿ ਰੂੜ੍ਹੀਵਾਦੀ ਆਗੂ ਸ਼ਰੇਆਮ ਨਸਲਵਾਦੀ ਗਾਲੀ-ਗਲੋਚ ਕਰ ਰਹੇ ਹਨ ਅਤੇ ਬਾਕੀ ਰਿਪਬਲਿਕਨ ਚੁੱਪ ਧਾਰ ਕੇ ਤਮਾਸ਼ਾ ਵੇਖ ਰਹੇ ਹਨ। ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਅਮਰੀਕਾ ਦੁਨੀਆ ਭਰ ਤੋਂ ਆਏ ਮਿਹਨਤੀ ਲੋਕਾਂ ਦੇ ਸੁਮੇਲ ਨਾਲ ਬਣਿਆ ਇੱਕ ਖ਼ੂਬਸੂਰਤ ਦੇਸ਼ ਹੈ। ਜੇਕਰ ਕਿਸੇ ਵੀ ਮਿਹਨਤਕਸ਼ ਭਾਈਚਾਰੇ 'ਤੇ ਅਜਿਹੇ ਕਾਇਰਾਨਾ ਹਮਲੇ ਹੁੰਦੇ ਹਨ, ਤਾਂ ਇਹ ਦੇਸ਼ ਦੀ ਬੁਨਿਆਦ 'ਤੇ ਸਿੱਧਾ ਹਮਲਾ ਹੈ ਅਤੇ ਇਸ ਨਫ਼ਰਤ ਖ਼ਿਲਾਫ਼ ਸਾਰਿਆਂ ਨੂੰ ਇੱਕਜੁੱਟ ਹੋ ਕੇ ਲੜਨਾ ਪਵੇਗਾ